- Desde a Confraría solicitouse que se levante a prohibición da pesca deportiva no porto
Este martes o alcalde de Malpica, Eduardo José Parga Veiga, mantivo unha xuntanza coa conselleira de Mar, Rosa Quintana, e a presidenta de Portos Galicia, Susana Lenguas, para abordar diferentes temas de interese para o sector da pesca no concello.
Entre os temas tratados atópanse a reparación da estrutura da ponte que dá acceso á zona norte do porto. Unha estrutura que se atopaba moi danada e cuxa reparación xa esta na última fase. Por outra banda, nesa xuntanza tamén se falou a sobre a seguridade na entrada da dársena. Tanto a presidenta de Portos como a conselleira comunicaron que se continuará coas medicións un pouco máis de tempo xa que «o inverno pasado e este non foron especialmente adversos».
Sobre a grúa de Barizo, as entidades autonómicas mantiveron conversas co Club Náutico, quen solicitou hai días un permiso por escrito para a valoración e arranxo da mesma.
Concello e Confraría, representada polo Patrón Maior, Pedro Pérez Martelo, e o seu secretario, Francisco Javier Varela, tamén solicitaron á Xunta de Galicia o levantamento da prohibición da pesca deportiva no porto, ou polo menos na zona norte. A presidenta e a conselleira comprometéronse a volver a analizar o asunto.
Ademais disto, o Patrón Maior tamén trasladou en aras de mellorar os servizos existentes para mariñeiros, redeiras e compradores, a necesidade de realizar melloras nas cubertas da nave de redes e na lonxa, ao estar moi deterioradas, así como instalar tomas de auga e puntos de luz para as embarcacións. A maiores, solicitouse unha nova sinalización para o tráfico pesado.