Miles de persoas, moitas máis serían en condicións normais, gozaron esta fin de semana en Malpica, con todas as medidas de seguridade, dunhas «atípicas» Festas do Mar, debido á situación extraordinaria que nos tocou vivir, derivada da pandemia da Covid-19.
Aínda que loxicamente non houbo verbenas nin procesión marítima, non por iso se perdeu de celebrar numerosas actividades en diferentes puntos da vila. O tempo axudou e Malpica volveuse a encher de turistas e visitantes para gozar das súas praias, a súa gastronomía e a hospitalidade das súas xentes.
Este sábado, e logo de moitos anos, volveuse a celebrar un programa de radio en directo no paseo marítimo, desde onde durante catro horas Malpica estivo presente reivindicando o tremendo potencial que posúe en todas as actividades nomeadas con anterioridade. O radiodj malpicán Dj- Roy aproveitou o seu programa musical na emisora Novahit para, de forma extraordinaria, pulsar tamén a situación actual do pobo nas súas diferentes áreas municipais, que ao final é moi importante, porque é o que redunda directamente na calidade de vida das persoas, tanto veciñas como achegadas.
Polos micrófonos da emisora desculpou a súa ausencia, por un leve contratempo de saúde, Alfredo Cañizo, concelleiro de Seguridade, Tráfico, Turismo e Servizos. Pero si se pasou o alcalde, Walter Pardo e a concelleira de Deporte, Mocidade, Cultura, Oleiría e Igualdade, Leticia Naya. Eles en primeira persoa contaron como están a funcionar as súas áreas de traballo. Destacando as enormes potencialidades da «Malpica Bonita» como o «mellor pobo do mundo», tal e como concluíu o alcalde.