- Nos labores de extinción participaron os Bombeiros de Carballo e membros do GES de Ponteceso
Un incendio orixinado nun alpendre no lugar de Filgueira, na parroquia malpicá de Cerqueda, mobilizou este xoves aos Bombeiros de Carballo tras ser requeridos polo CIAE 112 sobre as tres da tarde. Afortunadamente non houbo que lamentar danos persoais.
Segundo os servizos de extinción, o lume localizouse no lateral exterior dun pendello onde había diversos electrodomésticos usados. Dous membros do GES de Ponteceso iniciaran previamente a extinción das lapas, o que facilitou o labor dos Bombeiros que, posteriormente, se adentraron no interior do alpendre anegado de fume para comprobar que non houbese ningún foco no mesmo e iniciar a ventilación do lugar.
O incendio causou danos nos electrodomésticos usados e tamén en parte da parede e no tellado anexo ao cabanel.