O conselleiro do Medio Rural, José González, reuniuse co alcalde do concello de Tordoia, Eduardo Antonio Pereiro, para analizar a situación actual das infraestruturas rurais deste municipio e coñecer de primeira man as demandas e necesidades dos veciños relacionadas co agro. Neste sentido, ambos dirixentes analizaron a posibilidade de emprender novos proxectos de mobilización de terras co fin de dotar ás explotacións agrogandeiras da zona de terreos para traballar. Na xuntanza tamén estivo presente o director xeral de Desenvolvemento Rural, Miguel Pérez Dubois.
Durante o encontro, o conselleiro trasladoulle que coa futura Lei de recuperación e posta en valor da terra agraria de Galicia, que se presentará no Parlamento este ano, haberá novos instrumentos para mobilizar terreos que serán áxiles e rápidos como poden ser os polígonos agrarios e a xestión conxunta.
Así, José González salientou que entre os obxectivos da nova lei están os de promover a recuperación produtiva das terras, loitar contra o seu abandono e facilitar a ordenación dos predios, mediante a súa identificación cartográfica e o control dos seus usos.
O titular de Medio Rural explicou tamén que esa mobilización permitirá mellorar a base territorial das explotacións e o mantemento da poboación vencellada á actividade agrogandeira.