O director da Axencia Galega da Calidade Alimentaria, Martín Alemparte, asistiu este venres ao inicio da última das catro xornadas formativas dedicadas ao cultivo de grelo en Galicia, denominada Grelo galego, un cultivo con futuro. Tradición, innovación e territorio que terá lugar ata mañá no concello de Abadín. A través destas accións, a Consellería do Medio Rural aposta pola formación e a innovación no cultivo deste produto e están impartidas por expertos en enxeñería agrónoma e veterinaria.
O curso serve como introdución á Indicación Xeográfica Protexida Grelos de Galicia, centrándose nos requisitos de certificación e as vantaxes da marca. Ademais, abórdanse técnicas modernas de produción de grelo, así como nocións básicas de manexo integrado para poder identificar pragas e enfermidades que afectan a esta hortaliza.
No eido do procesado, a calidade e a comercialización, a acción formativa afonda nos criterios de conservación e lavado dos grelos. Asemade, conta cunha sesión sobre a recolección mecanizada deste vexetal. A clase desta tarde céntrase na parte teórica e a de mañá consistirá na demostración práctica.
Antes desta edición en Abadín, este curso formativo sobre o grelo galego xa se impartiu nos concellos de Ordes, O Rosal e Xinzo de Limia ao longo deste mes de novembro.