Miles de persoas saíron este mércores ás rúas de Bos Aires e outras cidades da Arxentina na primeira folga xeral en máis de catro anos, convocada polo sindicato Confederación Xeral do Traballo (CXT) para protestar contra as políticas do presidente do país, o ultradereitista Javier Milei, pouco máis dun mes despois da súa investidura.
A xornada de mobilizacións, á que se sumaron outros sindicatos, grupos políticos e organizacións sociais, serviu para protestar contrar os plans de Milei de desregular a economía, acometer profundos recortes no gasto público, limitar o poder dos sindicatos e atribuír ao seu Executivo amplas facultades propias do poder lexislativo baixo o pretexto dunha emerxencia múltiple. O paro xeral tiña previsto alongarse ata a medianoite local.