Miles de fieis despídense desde este luns de Bieito XVI na capela ardente que se abriu na basílica de San Pedro. Moitos visitantes fixeron cola na praza desde a madrugada para poder acceder os primeiros e está previsto que o velorio continúe ata as sete da tarde, tamén este martes e mércores.
Como Bieito XVI renunciou ao pontificado en 2013, para a cerimonia prescindiuse dalgúns distintivos que simbolizan a potestade de goberno. Así, non leva a cruz pastoral nin o palio papal. No seu lugar, colocarase o palio sobre o cadaleito como se fai para os bispos eméritos.
O féretro trasladouse desde o mosteiro Mater Ecclesiae, onde viviu desde a súa renuncia e morreu o sábado 31 de decembro ás 9:34 horas. O primeiro en velalo foi o Papa Francisco e será o encargado de oficiar a misa do funeral, este xoves 5 de xaneiro na praza de San Pedro.
De novo, os fieis poderán asistir a ese último adeus ao que, de forma oficial, só se convidou ás delegacións de Italia e Alemaña. Outras autoridades poderían asistir, con todo, a título persoal. En total, espérase ata unhas 60.000 persoas.