Varios miles de persoas acudiron este venres á invitación da vicepresidenta segunda, Yolanda Díaz, pese á extrema calor en Madrid. Díaz, entrou na praza do Matadoiro, onde se celebra o acto, acompañada de cinco amigas, en liña coa súa mensaxe de dar protagonismo á sociedade civil e non ás forzas políticas.
Fixo unha entrada ao ritmo dos acordes de «This girl is on fire», de Alicia Keys, nun acto que non se lembraba tan multitudinario nos últimos anos con simpatizantes á esquerda do PSOE. Achegáronse ata o lugar algúns expolíticos, como Gaspar Llamazares e Juan Carlos Monedero, un dos fundadores de Podemos, e algún en activo (o secretario xeral do Partido Comunista e secretario de Estado, Enrique Santiago, que desatendeu as suxestións da ministra de Traballo de que non quería líderes políticos).
Ao acto, case todo en tendido de sol, sumouse xente de todas as idades. A xornalista e humorista Nerea Pérez foi a encargada de dar paso ás intervencións de xuristas, emprendedores, médicos e ecoloxistas en representación desa sociedade civil que Díaz quere escoitar neste proceso e fíxoo con fortes críticas ao gasto militar, a precariedade laboral e a defensa do público.