Os expertos Mordechai Guri e Carmela Troncoso participarán a semana que vén nas VIII Xornadas Nacionais de Investigación en Ciberseguridade (JNIC) que se celebrarán en Vigo do 21 ao 23 de xuño. O evento é a principal referencia en expoñer os avances, o coñecemento e innovación de ciberseguridade a nivel nacional, e recala por primeira vez en Galicia, tras o seu paso en edicións anteriores por León, Granada, Madrid, San Sebastián, Cáceres, edición online durante a pandemia, e Bilbao.
As xornadas están organizadas polo Centro de Investigación en Tecnoloxías de Telecomunicación da Universidade de Vigo, atlanTTic, e o centro tecnolóxico Gradiant. A iniciativa conta coa colaboración do Instituto Nacional de Ciberseguridade de España (INCIBE).
JNIC é un congreso científico para o intercambio de coñecemento e experiencias no ámbito da ciberseguridade entre académicos, investigadores e empresas. As xornadas centraranse en tres eixos: Investigación, Transferencia e Innovación docente en Ciberseguridade; a través de diversas sesións e mesas redondas.
A programación do evento acolle dúas charlas maxistrais con relatoras de recoñecido prestixio internacional no ámbito da ciberseguridade. Mordechai Guri, experto informático e investigador en seguridade expoñerá na súa conferencia “Air-Gap Security: Attacks and Defense” canles de ocultación para a comunicación con redes fisicamente illadas. Na terceira xornada, Carmela Troncoso, doutorada na KULeuven e Associate Professor en EPFL (Suíza), abordará no seu relatorio “Privacidade por deseño: do papel á práctica”, distintas interpretacións desta filosofía de deseño de sistemas dixitais, con exemplos de uso de tecnoloxías deseñadas para mellorar a privacidade (Privacy Enhancing Technologies) combinadas con sistemas que permiten funcionalidades complexas sen necesidade de colleitar nin procesar datos.