Morre aos 58 anos María Pardo, exconcelleira do PP de Santiago, con raíces na Costa da Morte

María foi encargada da xestión do Urbanismo de Santiago de Compostela entre os anos 2011 e 2014 e ademais exerceu como voceira do goberno do Partido Popular (PP). María Pardo Valdés faleceu pouco antes das catro da madrugada deste sábado, segundo confirmou a súa familia. Era procuradora e executiva de empresas, levaba un tempo enferma e nas últimas semanas sufriu un empeoramento do seu estado de saúde que acabou con este fatídico desenlace. María tiña raíces lucenses por parte paterna e da Costa da Morte pola materna, a súa avoa era irmá de Isidro Parga Pondal aínda que a finada se criou, estudou e traballou sempre en Santiago de Compostela. Nai de tres fillos, era a máis nova dunha extensa familia de 13 irmáns.