- O suceso tivo lugar nun túnel, nunha zona de difícil acceso, sobre as 17:00 h deste luns
Unha persoa faleceu na tarde deste luns despois de ser alcanzada por un tren de mercancías -que facía a ruta entre Taboadela e Pontevedra- á altura do concello de Maside (Ourense).
O 112 Galicia tivo constancia do suceso dez minutos antes das 17:00 horas. Foi nese momento cando o mesmo persoal de Adif comunicou á central de emerxencias que un convoi alcanzara a unha persoa no punto quilométrico 275 da vía, moi próximo á estación de Maside. Indicaban ademais que o accidente se producira nun túnel, nunha zona de difícil acceso.
No operativo tamén colaboraron o Servizo de Urxencias Sanitarias de Galicia-061, os Bombeiros do Carballiño-O Ribeiro e a Garda Civil. As forzas da orde tratan de aclarar as circunstancias do suceso.