A directora de Turismo de Galicia, Nava Castro, asistiu este mércores á apertura do Hotel Alda Sada Marina, onde agradeceu ao sector turístico desta localidade coruñesa o seu compromiso coa calidade e a súa aposta pola mellora continua “adaptando a pranta hoteleira ás demandas actuais da man da excelencia”, dixo.
Durante o acto, felicitou aos responsables desta nova iniciativa empresarial por ter escollido unha localización como Sada, nas Rías Altas, despois de que na última década abrisen catorce establecementos repartidos pola xeografía galega e teñan xa máis de dez hoteis en varios puntos do Estado. “Este crecemento nun espazo de tempo tan breve é, sen dúbida, omellor exemplo para todas aquelas empresas que queiran apostar por Galicia”, indicou.
A directora de Turismo de Galicia puxo de manifesto, ademais, o papel que este novo establecemento poderá ter no xeodestino A Coruña-As Mariñas –no que se integra Sada– e que, segundo os datos do Instituto Nacional de Estatística (INE), é un dos máis importantes da Comunidade en canto á súa demanda turística, superando os 1,2 millóns de pernoitas o ano pasado.
Nava Castro salientou, ademais, a riqueza patrimonial e paisaxística deste destino especialmente as súas praias, a reserva da biosfera das Mariñas ou o museo Carlos Maside, que o vindeiro ano celebrará o seu cincuenta aniversario.