Os amigos do alleo volveron ás andadas na madrugada deste venres. As forzas da orde investigan se se puidese tratar dos mesmos asaltantes nos seus diferentes actos delituosos, e mesmo se puidesen ser os mesmos que levan xa semanas cometendo roubos e atracos en diferentes puntos de Arteixo, Carballo, Zas, Ponteceso, etc…
Na madrugada deste venres, xa desde primeira hora houbo intentos de roubo en establecementos de Arteixo, aínda que en principio con só danos materiais. Igualmente ocorreulle ao bar O Estanco de Paiosaco, sobre as tres da madrugada un descoñecido emprendeuna a golpes coa porta do establecemento, que aínda que na actualidade está pechado, comunícase interiormente co estanco que si está operativo e sospéitase que posiblemente fose o obxectivo do roubo, aí saltou a alarma e puxo en alerta aos propietarios que viven no mesmo edificio, deste xeito o presunto ladrón desistiu e fuxiu á carreira en dirección Carballo cunha pata de cabra na man.
Minutos máis tarde tocáballe a quenda á cervexaría A Tella da Silva en Cerceda, onde dous ladróns coa cara tapada sorprenderon ás empregadas do local á hora do peche e levaron o diñeiro da caixa rexistradora e da máquina comecartos.
Quizais a peor parte levouna un establecemento de venda de maquinaria de xardinería situado no lugar da Piroga en Baio, onde aínda non fai nin 15 días do último roubo neste mesmo negocio. Nesta ocasión os amigos do alleo actuaron ás dúas e cuarto da madrugada, fálase de tres individuos, chegaron nun coche e fixeron un butrón no cristal do escaparate, segundo o propietario, que aínda está a valorar os danos e o subtraído, levaron de todo, motoserras, rozadoras, grupos electróxenos, robots de xardín… Mesmo na fuxida atropelaron algunha máquina que quedou inservible. Afírmase que realizaron un disparo, aínda que se descoñece se real ou de fogueo.
