O Concello organiza o programa Outono Activo, unha nova iniciativa que inclúe andainas por entornos fluviais do termo municipal e que vai dirixida a persoas maiores de 55 anos de idade. O propósito é ofrecer a ese colectivo a oportunidade de realizar actividade física ao aire libre e descubrir lugares e paraxes de alto valor natural, paisaxístico e patrimonial pola riqueza etnográfica dos muíños de auga que se atoparán nos roteiros.
A primeira das andainas será o xoves 20 de outubro. Trátase dun percorrido de sete quilómetros e dificultade moderada a carón do río Bradoso, con inicio e fin na escola de Cumiáns.
A segunda cita será o xoves 27 de outubro con outra ruta de cinco quilómetros, tamén de dificultade moderada, polo río Acheiro, con inicio e fin no museo dos Muíños de Golmar.
Nestes dous casos os participantes sairán en autobús desde a Praza Olonne sur Mer ás 10:00 horas e terán transporte de regreso ao rematar a andaina.
O xoves 3 de novembro realizarase a última das rutas, con protagonismo para o río Anllóns. A saída será ás 10:00 horas desde a Praza Olonne sur Mer, punto ao que retornarán os participantes tras un percorrido de sete quilómetros e dificultade baixa.
A inscrición nas tres andainas de Outono Activo abríronse este xoves. É gratuíta e vai dirixida en exclusiva a persoas maiores de 55 anos de idade e empadroadas no termo municipal da Laracha. Para anotarse é preciso cubrir o formulario de inscrición que estará dispoñible na web municipal ou tamén pode facerse contactando no edificio administrativo da Laracha de xeito presencial ou chamando ao 981612811.