O Bergantiños tivo a oportunidade de lucirse este domingo na casa ante un rival directo da zona baixa da táboa, o Real Oviedo B, pero non puido ser. Xornada 17 no grupo I de Segunda RFEF, o equipo asturiano que dirixe Jaime Álvarez estivo moi ben plantado sobre o céspede artificial das Eiroas nun duelo directo para lograr a permanencia. O dorsal 12 do Oviedo, Masca, tivo o seu día este domingo anotando os dous goles do encontro, o primeiro aos seis minutos de partido, provocando a presión sobre o equipo de Lemos. A partir de aí, durante o primeiro tempo o Bergantiños tivo un par de ocasións a balón parado, pero sen poñer en demasiados apuros a Marco, o porteiro visitante. Tras o descanso chegou un saque de esquina en curto. Entón, un futbolista do cadro asturiano foi a rematar un balón dividido, pero impactou en Sellés. O colexiado non o pensou e sinalou un rigoroso penalti ante o asombro dos presentes. Masca foi o encargado de lanzalo, enganou ao porteiro e anotou a pena máxima que sentenciaba o encontro, 0-2. Con este resultado o Bergantiños queda provisionalmente situado no posto número 15 da clasificación xeral, en zona de descenso con 16 puntos.