- Condonase o pagamento do primeiro semestre da taxa dos postos fixos de venda do recinto feiral de Paiosaco.
- Permítese a entrega de produtos listos para o seu consumo nos establecementos hostaleiros.
Este xoves celebrouse na Laracha unha nova reunión do comité municipal de seguimento ante o Covid-19.
Entre as cuestións de interese que foron tratadas na reunión, acordouse a condonación da taxa do primeiro semestre do ano aos postos fixos de venda no campo da feira de Paiosaco. Por tanto, non se emitirán os recibos correspondentes aos seis meses entre xaneiro e xuño aos comerciantes que teñen asignados os 470 postos permanentes do recinto.
Cabe lembrar que a feira de Paiosaco cesou a súa actividade o 15 de marzo debido á alerta sanitaria.
Por outra banda, e despois de que profesionais do sector trasladasen as súas dúbidas ao respecto, o Concello informa que no termo municipal da Laracha permítese a recollida nos establecementos hostaleiros de produtos de alimentación listos para o seu consumo.
Os locais que realicen esa actividade deben impedir que se consuman ditos alimentos no establecemento e garantir que se adopten as medidas necesarias de saúde e hixiene entre os empregados e clientes e entre os clientes entre asi, tales como limitar o aforo, manter a distancia social dun mínimo dun metro, empregar guantes na entrega, etc.