Os equipos de Salvamento Marítimo e Gardacostas de Galicia ocupáronse de senllas evacuacións, efectuadas desde Cíes e Ons, respectivamente.
Ambos os dous casos estiveron relacionados con situacións accidentais, tales como unha caída ou unha queimadura con leite fervendo.
Así, o persoal do Servizo de Gardacostas de Galicia, a bordo do helicóptero Pesca I, recolleu a un octoxenario que sufrira unha caída e lle provocara importantes lesións: golpes en cabeza e brazo e necesidade de sutura.
Co fin de garantir un traslado seguro e respectuoso co seu estado de saúde, optouse polo emprego dos recursos aéreos, aínda que, tal e como explicaron os profesionais sanitarios, tratábase dunha urxencia médica, mais non dunha emerxencia vital.
Deste xeito, para coordinar o traslado nas condicións óptimas, os xestores do 112 Galicia atenderon as peticións do equipo de Urxencias Sanitarias de Galicia-061 e solicitaron o apoio dos rescatadores de Salvamento Marítimo e Servizo de Gardacostas de Galicia. Finalmente, desprazouse o persoal do Pesca I para levar o ferido ata o Hospital Álvaro Cunqueiro de Vigo.
Por outra banda, en Cíes, un menor necesitou asistencia por queimaduras con leite fervendo. Neste caso, a evacuación foi realizada polo persoal de Salvamento Marítimo a bordo da embarcación Salvamar Mirach tras recibir as indicacións do equipo médico de Urxencias Sanitarias de Galicia-061.
As dúas situacións rexistráronse no 112 Galicia entre as once e as doce da noite pasada.