- Dos 157 operativos realizados pola agrupación, 69 destacan polas desinfeccións en espazos públicos, controis de aforo ou reparto de material de protección
A agrupación municipal de Protección Civil de Camariñas realizou durante o 2020 un total de 157 intervencións das que o 44%, concretamente 69, estiveron relacionadas e motivadas pola pandemia da Covid-19.
Case a metade das actuacións levadas a cabo pola agrupación centráronse na desinfección de espazos públicos, o reparto de material de protección e educativo polos fogares do municipio ou a despregadura de operativos de control de aforo en datas sinaladas como a cabalga de Papá Noel, a procesión do Carme ou o cribado realizado no centro de saúde. O resto das actuacións estiveron relacionadas con cuestións de seguridade viaria (accidentes ou caídas de árbores), recollida de animais soltos e outras actuacións en espazos públicos (rego nos xardíns, incendios ou inundacións).
A alcaldesa de Camariñas, Sandra Ínsua, volveu a lembrar a importante labor que realizan continuamente os membros de Protección Civil na localidade.