O Auditorio Mar de Vigo segue recuperando o ritmo de eventos e congresos, e desde esta semana volve albergar outra gran cita de carácter internacional. Trátase do vixésimo Congreso Internacional do Institute of Fisheries Economics and Trade, un prestixioso foro de intercambio de ideas, relatorios e debates sobre os recursos mariños, no que colaboran na organización as universidades de Vigo, Santiago de Compostela e A Coruña, ademais da Universidade de Cantabria.
Ata o venres, pasarán polos diversos espazos do Mar de Vigo, desde o Hall á Sala Terra, pasando polo Auditorio central, máis de 200 participantes diarios, procedentes de 50 países de todo o mundo. Neste simposio abordaranse temas específicos como os mercados e o consumo, a gobernanza e os sistemas de xestión, a diversidade produtiva ou cuestións de xénero relacionadas co medio mariño. O foro busca promover un intercambio de ideas na investigación, a información e a economía da pesca e a acuicultura.