David Kozák, o universitario checo de 24 anos que matou este xoves a 14 persoas e feriu a outras 25 en Praga antes de suicidarse, non tiña antecedentes policiais, pero anunciara unha matanza nas redes sociais e estaba a ser buscado pola Policía como sospeitoso dun dobre homicidio hai unha semana e outro este mércores.
Kozák, estudante de Historia na Universidade Carolina de Praga, entrou no edificio da Facultade de Filosofía e disparou de forma indiscriminada causando unha matanza, antes de subir ao tellado e disparar contra os transeúntes. Asediado pola Policía, o agresor suicidouse dun disparo na cabeza.
O autor, que non tiña antecedentes penais, gozaba dun bo expediente académico e foi descrito como «retraído» por algúns dos seus compañeiros de estudos. As autoridades descartaron calquera vinculación do agresor con grupos terroristas.