O BNG de Dumbría vén de presentar unha iniciativa no último pleno da corporación na que insta ao Concello a que solicite á Xunta de Galiza a cesión do inmoble coñecido como A Casilla, no lugar de Bustelo, para que sexa destinado a uso municipal.
O voceiro municipal dos nacionalistas, Xaime Trillo, explicou que A Casilla, que tamén é chamada “Casa do legoeiro”, está en estado de abandono e case en ruína. “Se a Xunta non ten ningún interese nela, tendo en conta o desleixo no que se encontra, deberíase instar para que a ceda ó Concello, porque en Dumbría si a necesitamos para ser aproveitada”, afirmou o portavoz do BNG, que sinalou que “podería ser habilitada para ser utilizada pola veciñanza ou polo tecido asociativo do municipio, e incluso cabería contemplar a posibilidade de construír alí un futuro centro de día, que tanto necesitamos”.
Por outra banda, Xaime Trillo tamén demandou ao goberno local o arranxo da estrada que vai de Salgueiros a Rebordelo, así como a da Pelexa. E pediu que acondicione “un camiño de monte que está en moi mal estado no lugar de Cheo”. O concelleiro nacionalista rogou que estas actuacións sexan tidas en conta para futuros plans de obras da Deputación da Coruña (POS).
Ademais, Trillo preguntou se o Concello está a informar á veciñanza sobre o impacto que tería a instalación de catro novos muíños de vento, previstos para a parroquia de Buxantes: dous no Carboal e outros tantos en Anseán. O voceiro do BNG indicou que o prazo de alegacións de ditos proxectos eólicos xa está aberto.