O BNG de Laxe recolle as denuncias que lle fan chegar as familias en relación ao mal funcionamento da fosa séptica do centro escolar CPI Cabo da Area, o que provoca unha situación de insalubridade e de risco sanitario que afecta directamente á seguridade e ao benestar dos nenos e das nenas, posto que esa instalación está no patio de recreo onde xoga o alumnado de primaria e, polo tanto, escolares de curta idade.
Segundo a información trasladada, cando a fosa séptica se enche verte o seu contido directamente sobre a area do patio a través dun tubo situado a rás de solo que actúa a modo de desagüe, provocando os consecuentes cheiros e verquidos de augas residuais. A situación, que se repite cada ano, é tal que mesmo ten provocado que os escolares se manchen xogando, recollendo a pelota etc, posto que os verquidos da fosa van directos ao patio do recreo e mesmo chega a desbordar as arquetas que están situadas diante do comedor.
O BNG de Laxe entende que esta situación é intolerable en calquera caso, pero máis tratándose dun centro educativo con escolares de curta idade, e demostra unha total falta de planificación e de abandono por parte do Goberno local do PP. Falta de planificación por parte do concello que debería levar un control para proceder ao baleirado da fosa séptica en tempo e forma e non como leva anos pasando que só actua cando xa a instalación está ateigada de lixo e rebosa coas consecuencias que denuncian as nais.
E tamén unha actitude de total abandono desa infraestrutura por parte do concello o que explica que, pasados os anos, siga a ras de chan un tubo que permite os verquidos das augas residuais da fosa cando esta se enche, vulnerando a normativa en vigor é poñendo en perigo a seguridade dos nenos e das nenas.
Finalmente, as nais tamén denuncian que non é a primeira vez que, unha vez detectado o verquido, o concello proceda a facer o baleirado en horario lectivo, con todo o que iso implica para o conxunto da comunidade educativa.
Para evitar que se repita esta situación, en canto se constitúa a nova corporación, o BNG vai levar este asunto ao pleno do concello para buscar unha solución definitiva e que nunca máis os nenos e as nenas teñan que soportar unha situación inadmisible que mesmo pon en risco a súa saúde. Reclamará ademais, que se revise a situación das fosas sépticas dos centros educativos de Laxe, que se corrixan todas as deficiencias e que se estableza un calendario de control e baleirado das fosas.
Igualmente, o BNG de Laxe tamén levará o problema ao Parlamento galego para que a Consellería de Educación explique como é posible que se dea esta situación en pleno século XXI, na que un centro educativo aínda non dispón de rede de saneamento.
