25
O Bloque Nacionalista Galego de Vigo urxe investigar a orixe da elevada presenza de bacterias fecais na praia de Samil, á altura do areal da Argazada. A fronte nacionalista solicita acceder ao expediente íntegro para coñecer en detalle a situación que levou a desaconcellar este pasado sábado o baño neste tramo e chama á concellería de Medio Ambiente a actuar con «dilixencia» para aclarar a causa da contaminación.
O concelleiro do BNG de Vigo, Xabier P. Igrexas, cualificou a situación de «alarmante» pola elevada presenza de bacterias fecais como a Enterococco intestinal e Escherichia coli, segundo revelaron as análises da Dirección Xeral de Saúde Pública, así como de «insólita» pola localización das mesmas, na zona central da praia de Samil.