O Grupo Parlamentar do Bloque Nacionalista Galego (BNG), a iniciativa dos deputados Daniel Pérez López e Luis Bará Torres, presentaron unha Proposición non de lei para debate na Comisión 2ª, sobre a situación da Lagoa de Traba, en Laxe, Espazo Natural Protexido e inscrito na Rede Natura 2000, cunha ampla riqueza a nivel ornitolóxico e vexetal.
Actualmente, o río de Traba e o rego de Vao que constitúen a afluencia fluvial á lagoa, presentan as súas ribeiras sen mantemento e do mesmo xeito o regato polo que a mesma lago desauga amosa un exceso de matogueira por sobrecrecemento vexetal. Esta situación provoca unha serie de problemas a todo o entorno deste ecosistema. O primeiro é que a lagoa perde en biodiversidade ao non manter o réxime hidrolóxico natural debido á colonización vexetal descontrolada que estanca a auga de río e regatos do sistema lacunar. E o segundo, e non menos grave, é que as fincas colindantes á lagoa pasan a meirande parte do ano asolagadas constituíndo un grande problema para o cultivo e mantemento das mesmas, e un perigo para a veciñanza á hora de utilizar maquinaria agrícola permitida nas súas propiedades.
Á vista do estado actual da Lagoa de Traba, é urxente e necesaria unha actuación por parte da administración competente, que non é outra que a Xunta de Galiza. O feito de non levar a cabo labores previas de conservación durante anos coadxuvaron na degradación actual deste ecosistema único e na perda constante de biodiversidade. Unha actuación imprescindible que, ao tempo que recupere a lagoa, resolva o grave problema de asolagamentos que sofren as fincas circundantes, que condiciona, dificulta ou mesmo impide o cultivo e mantemento das mesmas. Realizar esas labores habituais supón, a día de hoxe, un perigo para a veciñanza cando emprega maquinaria agrícola permitida nas súas propiedades.
Por elo, o BNG insta o Goberno galego a adoptar con urxencia as medidas necesarias para restablecer o réxime hidrolóxico natural do conxunto Lagoa-Dunas de Traba, acometendo a limpeza das ribeiras dos ríos Traba e Vao e do regato de desaugue da Lagoa de Traba, e todo isto co obxectivo de recuperar e conservar a Lagoa e posibilitar, ao tempo, as actividades socioeconómicas e patrimoniais da veciñanza de Traba de Laxe nas fincas circundantes.