A Xunta apoia con preto de 71.000 euros a seis entidades de economía social de Ferrol e Narón. A Consellería de Promoción do Emprego e Igualdade publicou no DOG a resolución das axudas do Bono Consolida correspondentes á pasada anualidade.
A delegada territorial da Xunta en Ferrol, Martina Aneiros, lembra que este programa ten como finalidade o afianzamento de entidades de economía social. O ano pasado a convocatoria incluíu tres liñas de axudas para incidir na transformación dixital das empresas para favorecer o incremento da súa competitividade.
As tres liñas de financiamento da convocatoria foron para a transformación dixital da empresa, para a profesionalización e desenvolvemento estratéxico e para a mellora da competitividade empresarial a través de investimentos comúns.
Entre as entidades beneficiarias atópanse as cooperativas Rexenerando, Ferrolana de Profesores de Autoescuela e ASCM Ferrolterra, en Ferrol, e Cogalso Ferrolterra, Agroflor e Blavice Services, estas tres últimas pertencentes a Narón.