O Calvo Xiria balonmán aguantou ben a primeira parte do partido, dominando no xogo e marcador, 10-7 no minuto 22, cuns porteiros, Iago e Bravo, moi enchufados chegando a táboas, 12-12, ao descanso, pero non mostrou a imaxe que o trouxo ata aquí e iso pesoulle no resultado final da súa primeira cita nesta fase de ascenso a División Honra Prata, sobre todo na segunda parte do encontro onde case foi a remolque de cinco ou seis goles na súa contra ata o final, que como mal menor acabou perdendo por catro de diferenza 24-28 ante o BM Maracena La Esquinita de Javi, de Granada. Queda todo aberto para as seguintes xornadas de sábado e domingo, pero terá que mellorar o seu xogo o conxunto carballés, porque xa non se permiten máis erros para poder optar á única praza de ascenso en xogo. García Pichel polo conxunto local e José Antonio Bravo polo visitante foron os homes fortes do ataque con 8 e 7 goles marcados respectivamente cada un.
Na inauguración da fase ás 17:30 horas, o Handbol Sant Quirze de Barcelona gañou o seu partido contra o Levante, casualmente pola mesma diferenza de catro tantos 27–23.
