O capitán do petroleiro Prestige, Apostolos Mangouras, non terá que volver ao cárcere. A Audiencia Provincial da Coruña declarou a remisión da pena. Fora condenado polo Tribunal Supremo no 2016 a dous anos de prisión por un delito contra o medioambiente pola desobediencia ás autoridades marítimas españolas durante o rescate do buque. Xa entón os avogados de Mangouras pediran a suspensión da pena pola súa avanzada idade, ten na actualidade 85 anos, e polo seu estado de saúde.
A Audiencia provincial decretara a suspensión da pena durante tres anos a condición de que non volvera delinquir. Cumprido o prazo e as condicións que se lle impuxeron, a suspensión pasa a ser permanente. Se non se presenta un recurso de súplica en tres días a decisión será firme.