O Concello de Ponteceso continúa co seu plan de mellora das diferentes aldeas do rural do municipio e, nesta ocasión, vén de completar a renovación da pista que une a Cooperativa de Pazos e a zona de Vimieiro.
A obra consistiu na mellora do firme desta pista, que estaba deteriorado polo paso do tempo e do tráfico. As actuacións completáronse, ademais, coa renovación da sinalización.
O alcalde, José Manuel Mato, sinala que o obxectivo destes traballos é garantir «que as vías e estradas de titularidade municipal estean no mellor estado posible» e apunta, ademais, a importancia de acondicionar este camiño para mellorar a calidade de vida da veciñanza.
O rexedor fai fincapé en que “dende o goberno local traballamos cada día para mellorar as infraestruturas do noso rural, buscando que os nosos veciños e veciñas gocen das mellores infraestruturas posibles”.