- Titulares do bono social e persoas que reciben tratamentos de osixenoterapia ou diálise peritoneal nos seus domicilios poderán acceder ás subvencións
Nos últimos anos aumentou considerablemente o recibo da luz, sobre todo durante este 2021. O Concello de Carballo, ante as dificultades que presentan algunhas familias para facer fronte á factura da electricidade, decidiu convocar unha liña de axudas para paliar a subida dos prezos ao considerar que «o acceso á electricidade é unha necesidade básica».
Poderán acceder ás axudas as persoas maiores de 18 anos ou menores emancipadas que cumpran algún dos seguintes requisitos: ser beneficiarias do bono social das diferentes comercializadoras de electricidade ou recibir durante o ano 2021, polo menos durante seis meses, osixenoterapia ou tratamento de diálise peritoneal domiciliaria.
As bases da convocatoria foron aprobadas este luns pola Xunta de Goberno Local. A subvención á que poderán acceder as persoas solicitantes será de 200 euros, nun pago único. A Concellaría de Igualdade e Benestar destina a esta liña de axudas, nesta primeira convocatoria, un máximo de 60.000 euros. O prazo de solicitude abrirase a partir da publicación correspondente nos boletíns oficiais.