O concello reclama máis recursos e atención para as persoas que padecen epilepsia

A alcadesa de A Coruña, Inés Rey, xunto con outros membros da corporación e da Asociación Coruñesa de Epilepsia en María Pita_Fonte: coruna.gal

  • Ao ano diagnostícanse uns 2,4 millóns de casos de epilepsia no mundo

Con motivo do Día Internacional da Epilepsia, a alcaldesa de A Coruña Inés Rey e a concelleira de Benestar Social, Yoya Neira, xunto a outros edís da Corporación, participaron en María Pita na lectura dun manifesto organizada pola Asociación Coruñesa de Epilepsia, que se converteu nunha excelente oportunidade de “sacar a enfermidade das sombras”, como reza o lema utilizado este ano pola Organización Mundial da Saúde.

O obxectivo é visibilizar unha doenza crónica rodeada de falsas crenzas e que aínda segue estigmatizando socialmente a quen a padece. Por iso, a OMS puxo en marcha unha campaña para “proporcionar mellor información, aumentar a sensibilización e fortalecer os esforzos públicos e privados para mellorar a atención e reducir o impacto da enfermidade”, explicou Santiago Grandío, presidente da asociación coruñesa e encargado de ler o manifesto.

“Desde o concello pedimos unha sociedade libre de estigmas, que tolere e non rexeite, que empatice coa persoa do lado e para iso creo que é básico que esta sociedade estea informada”, sinalou a rexedora, quen tamén pediu máis recursos económicos para loitar contra a doenza.

O manifesto destaca que se diagnostican anualmente uns 2,4 millóns de casos de epilepsia. Ademais, preto do 80% das e dos pacientes viven en países con ingresos baixos e medianos, e estímase que o 70% das persoas con epilepsia poderían vivir sen convulsións se se diagnosticasen e tratasen adecuadamente.