O conselleiro delegado de Ence declarado «persoa non grata» en Pontevedra

O pleno da Corporación municipal de Pontevedra declarou este luns «persoa non grata» ao presidente e conselleiro delegado de Ence, Ignacio de Colmenares y Brunet. A sesión plenaria aprobou esta declaración cos votos a favor dos dous grupos proponentes e que conforman o goberno, BNG e PSOE. Tanto o PP como o concelleiro non adscrito, Goyo Revenga –ex de Ciudadanos–, votaron en contra. Durante o debate, o concelleiro do BNG César Mosquera responsabilizou a Colmenares de «dirixir e permitir» o » escrache violento» sufrido polo alcalde, o nacionalista Miguel Anxo Fernández Lores, e varios membros do seu goberno por parte dun grupo de traballadores da empresa de celulosa o pasado 11 de marzo. Un acto de protesta no que houbo «risco real» para a integridade física do rexedor.