- O equipo deportivista empatou en Riazor co Alcorcón 0-0.
Luís César atreveuse a cambiar de sistema, algo que nin el nin Anquela contemplaran. Gran parte das preguntas do fútbol adoitan responderse con centrocampistas e Riazor asistiu a un capítulo máis ante o Alcorcón. O trivote permitiu, en apenas uns minutos, multiplicar as prestacións de xogadores que ata este partido naufragaran en cada batalla. De súpeto Álex sempre estaba no lugar adecuado porque non tiña que estar en todos á vez. Peru foi ese ‘ box to box’ que prometían desde Bilbao e Vicente… o mellor que se pode dicir de Vicente é que volveu parecerse a el mesmo. Non se esqueceu de xogar ao fútbol. Esta nova imaxe fixo que todos desen un paso adiante. Todos menos Longo. O italiano segue pelexado consigo mesmo e acabou apupado pola bancada, que viu máis grande que nunca a diferenza entre el e os seus compañeiros. Ao final 0-0, polo menos o Depor non perdeu.