O equipo coruñés logrou o seu primeiro triunfo a domicilio esta tempada ante o Unionistas de Salamanca (0-1), nun encontro que se puxo de fronte nada máis saltar ao campo. Adiantouse cun golazo de Héctor e non fixo máis nada que defender en todo o encontro, noutra actuación tecnicamente deficiente da maioría de xogadores deportivistas. Polo menos, os tres puntos serven para evitar que se acendan máis luces de alarma, pero non despexa dúbidas. Fernando Vázquez mostrouse satisfeito co triunfo do equipo, volvendo a subliñar que agora mesmo están en construción: “O máis importante foi a vitoria. Nestes momentos o equipo está para gañar. Independentemente dos medios que poidamos poñer para conseguilo. É importante sacar puntos á espera de futbolistas e que o desenvolvemento do equipo poida producir triunfos máis doados, se é que podemos conseguilos. Viñemos buscar un bo resultado nun campo moi difícil, ante un bo rival que está acostumado a este terreo de xogo e cun adestrador intelixente”.
48