O Día Internacional da Muller celébrase con grandes e coloridas concentracións en diferentes partes do mundo. En Francia, o presidente Emmanuel Macron aproveitou a ocasión para anunciar un proxecto de lei para inscribir nos próximos meses o aborto na Constitución francesa. O anuncio de Macron, con todo, non acougou os ánimos dos sindicatos que continúan protestando contra a súa reforma das pensións.
En Grecia, a convulsión política tamén coincide con esta conmemoración feminista. Seguen as mobilizacións contra o Goberno polo tráxico choque de trens que deixou case 60 mortos.
A traxedia embaza esta data igualmente en Siria e Turquía, países que permanecen en duelo polos terremotos do pasado 6 de febreiro, e onde decenas de mulleres perderon a vida.
Por outra banda, considérase que Europa é unha das rexións máis avanzadas en materia de dereitos de xénero, pero, segundo estudos, a verdadeira igualdade chegará nos próximos 50 anos.