No seu vixésimo aniversario diversificará os espazos das representacións e organizarase unha mención homenaxe con motivo do centenario de Agustín Magán. A iniciativa está impulsada pola Federación Galega de Teatro Afeccionado (Fegatea) e as obras que participan son cada ano seleccionadas por un xurado e representan as propostas máis salientables dos grupos federados das catro provincias galegas.
A programación arrancará o venres 17 de setembro ás 20,00 horas no Teatro Principal a cargo de A.C. Teatrino e a comedia Lisístrata. O Teatro Principal acollerá tamén as sesións do sábado 18 con Paso Valverde e o espectáculo de monicreques Carolina Ultrasónica e do domingo 19, con Teatro Escoitade e a representación Dominó Celeste Que vai ser de ti Ernesto?.
As funcións continuarán o venres 24 de setembro, neste caso no Centro Sociocultural de Santa Marta-Sala Agustín Magán, ás 19,00 horas con A Tequerreté Teatro e a comedia Confinad@s. O sábado 25 tamén no mesmo escenario e á mesma hora actuará Axóuxere Teatro con Facendo as partixas.
O Festival rematará no Salón Teatro. As representacións arrancarán o venres 1 de outubro ás 20,00 horas con FarandOleiras Cabaré que interpretarán Olimpo’s. O sábado 2 de outubro a quenda será para Farándula Vetulina con A derradeira bala. A última representación será o domingo 3 de outubro con Andaravía Teatro e a peza Xacovedra.
Para rematar as actividades desta vixésima edición, o día 3 de outubro a partir das 19,30 horas acollerá unha homenaxe a Agustín Magán, que lle dá nome ao festival. Contarase coa presenza da súa familia, do grupo que formou e dirixiu durante anos, Ditea, entre outros.