Os membros do G7 reafirmaron o seu compromiso con Ucraína na agresión que está a sufrir. Todos os países comprometéronse a seguir apoiando a Ucraína financeiramente e con armas, á vez que manteñen a vía das sancións a Rusia. O chanceler alemán tamén anunciou que proporcionará máis tanques Leopard.
Olaf Scholz, destacou: «Por desgraza, mesmo despois dun ano de guerra e derramamento de sangue, non vexo ningún esforzo por parte de Rusia para poñer fin a esta guerra criminal. Pola contra, (o presidente ruso Vladimir) Putin segue mantendo un comportamento irresponsable en materia nuclear e agora está a poñer en dúbida o último tratado de desarmamento sobre armamento nuclear estratéxico, o tratado con Estados Unidos.»
O presidente estadounidense, pola súa banda, buscou aliviar as tensións con China, argumentando que «non hai probas» de que Pequín estea a fornecer armas a Rusia. O encontro tivo lugar unhas horas despois de que a Asemblea Xeral da ONU aprobase unha resolución que pide o «cesamento de hostilidades» en Ucraína e a retirada das tropas rusas, co voto a favor de 141 países, 7 en contra e a abstención de 32.