O Consello de Ministros aprobou o Proxecto Estratéxico para a Recuperación e Transformación Económica (PERTE) de Dixitalización do Ciclo da auga, o Plan de Desenvolvemento da Rede de Transporte de Enerxía Eléctrica no horizonte 2026 e a Folla de ruta do biogás. A vicepresidenta terceira do Goberno e ministra para a Transición Ecolóxica e o Reto Demográfico, Teresa Ribera, afirmou que estes tres proxectos expresan a vocación transformadora do Goberno sobre a enerxía e a auga, «dous recursos estratéxicos e escasos» e «determinantes na economía e no benestar das persoas».
Ademais, o Goberno aprobou o Proxecto Estratéxico para a Recuperación e Transformación Económica Aeroespacial, (PERTE), que prevé mobilizar máis de 4.500 millóns de euros para impulsar a I+D+i no sector aeronáutico e do espazo. A ministra de Ciencia e Innovación, Diana Morant, explicou que a iniciativa ten carácter internacional, xa que combina fondos de recuperación de España e de Portugal e inclúe proxectos de cooperación a través da Axencia Espacial Europea.