- Optarase por simplificar os trámites administrativos para facilitar a actividade económica nas zonas afectadas polo despoboamento
O presidente do Goberno, Pedro Sánchez, presidiu este venres a Comisión Delegada para o Reto Demográfico, á que asistiron outros trece membros do Gabinete, na que se expuxeron as primeiras medidas para loitar contra o despoboamento e ofrecer oportunidades de desenvolvemento no ámbito rural.
«Traballamos para evitar un país que avance a diferentes velocidades e para non deixar a ninguén atrás», afirmou a vicepresidenta e ministra para a Transición Ecolóxica e o Reto Demográfico, Teresa Ribera, tras a reunión, celebrada na Adega Institucional de La Grajera, na Rioxa.
Os traballos da Comisión Delegada do Goberno complementaranse cos de administracións autonómicas e locais, sociedade civil e a colaboración público-privada que, conxuntamente, conducirán á aprobación da Estratexia Nacional fronte ao Reto Demográfico na próxima Conferencia de Presidencias.
Primeiras liñas de traballo
A Comisión expuxo varias iniciativas como facilitar a relación dos cidadáns coas administracións, simplificar trámites administrativos para facilitar o emprendemento e a actividade económica nas zonas afectadas polo despoboamento, ou promocionar proxectos de innovación desde a colaboración público-privada.
Entre elas, o impulso dun Estatuto Básico dos Pequenos Municipios; unha análise para a posible descentralización de centros de referencia da administración pública; a universalización da cobertura de banda ancha de 30 Mbps en liña co obxectivo da Axenda Dixital Europea; ou a creación de incentivos e medidas de discriminación positiva nas axudas á rehabilitación para a mellora da eficiencia enerxética e o fomento de instalacións de autoconsumo.