O PSOE e Unidas Podemos alcanzaron este xoves un acordo para reformar as pensións. O ministro de Inclusión, Seguridade Social e Migracións, José Luis Escrivá, convocou a mesa de negociación con sindicatos e empresarios tras chegar “practicamente” a un acordo coa Comisión Europea sobre os elementos que conformarán a segunda pata desta reforma. Escrivá lembrou que debe culminarse neste primeiro semestre porque está asociada ao cuarto desembolso cara a España dos fondos europeos, que supoñen 10.000 millóns de euros. De non cumprir cos prazos acordados con Bruxelas para sacar adiante a reforma das pensións, aplicaríase a máxima sanción prevista no procedemento de suspensión de pagos para os atrasos na entrada en vigor, aínda que en ningún caso a sanción afectará á totalidade do tramo.