O Goberno local de Muxía, unha vez recibido o permiso por parte de Augas de Galicia para a construción da ponte de Vilachán, propón a celebración dun pleno na primeira semana de marzo para a aprobación do financiamento da obra con fondos propios, que sumará un investimento de máis de 70.000 euros.
A ponte realizarase con material prefabricado e foi deseñada por un enxeñeiro experto na materia, onde a montaxe con este sistema mellorará os prazos de execución da obra.
Desde o goberno local destacan que “queda clarificado que tan pronto se obtiveron todos os permisos, sobre todo o de Augas de Galicia, todo o traballo está listo e preparado. Agora, e previo informe de intervención, levarase a pleno de maneira inminente”, conclúen.