- A proposta tamén inclúe a modificación do ICIO e a concesión da ocupación do monte ‘Brañas Verdes’
O goberno local de Camariñas levará ao pleno deste venres a aprobación inicial dunha ordenanza de saneamento, adaptada ao regulamento vixente, co obxectivo de mellorar o control das augas residuais que se verten á rede e aos colectores de titularidade municipal.
Por outra banda, o executivo tamén presentará unha proposta para actualizar o Imposto de Instalacións, Construcións e Obras (ICIO) e igualalo así ao porcentaxe que se aplica nos municipios colindantes, pasando dun 2% a un 3%.
A día de hoxe Camariñas ten o ICIO máis baixo que concellos como Vimianzo (3%), Zas (chega ao 4% nalgúns tramos), Cabana (preto do 3%), Muxía (3%) e Laxe (3,5%). «Realizar esta modificación vai a ser moi importante para a execución de novos investimentos que redunden na mellora da calidade de vida da cidadanía», destacou a alcaldesa de Camariñas.
Ademais, na sesión plenaria tratarase a petición da Consellería de Medio Rural da concesión de ocupación temporal por de 30 anos do monte ‘Brañas Verdes’ por parte de Electra del Gayoso para a repotenciación da liña eléctrica que dá servizo aos lugares de Brañas Verdes, Pescadoira, A Cancela, Brea, Lamastredo, Santa Mariña, Arou e outros da contorna.