O presidente do Goberno e líder do PSOE, Pedro Sánchez, anunciou este sábado que o Consello de Ministros vai aprobar o vindeiro martes unha partida de máis de 1.300 millóns de euros para reforzar a Formación Profesional.
«Imos investir 1.300 millóns de euros para reforzar aínda máis a Formación Profesional no noso país. Levamos investidos 6.600 millóns de euros ao longo desta lexislatura e aprobouse a lei de Formación Profesional», engadiu no acto de presentación da candidata á alcaldía de Pamplona, Elma Saiz, xunto coa secretaria xeral do PSN-PSOE e candidata á reelección de Navarra, María Chivite.
Con esta cantidade, continuou, aumentaranse en máis de 45.000 as prazas de FP bilingüe e crearanse 824 novos centros de Capacitación Dixital e máis de 1.500 aulas de tecnoloxía aplicada e emprendemento. O obxectivo, segundo o líder do PSOE, é «que os nosos rapaces, cando saian da formación profesional, teñan todas as cualificacións para poder ser empregados ou crear unha empresa» e reducir o paro xuvenil.