- Javier Martín e Alexandre Brea, do Instituto Galego de Física de Altas Enerxías, compartiron coñecementos co alumnado de 1º e 2º de Bacharelato
Este luns o IES Maximino Romero de Lema de Baio, Zas, inaugurou o Club de Ciencia con dúas charlas divulgativas impartidas por investigadores do Instituto Galego de Física de Altas Enerxías-IGFAE. Por unha banda, o alumnado de 2º de Bacharelato tivo a oportunidade de escoitar a Javier Martín co relatorio Caendo no buraco negro. O obxectivo desta exposición era dar a coñecer a física de partículas e os buracos negros.
Por outra banda, o alumnado de 1º de Bacharelato participou na charla do físico, investigador e recoñecido poeta lusófono, Alexandre Brea. A través da Física de partículas tentouse dar resposta a diversas cuestións como o nacemento do universo, a orixe da materia que compón as estrelas e os planetas ou os coñecementos que existen sobre a antimateria.