Máis de 20 percebeiros da confraría de Corme, en Ponteceso, volveron ás rochas do Roncudo para tentar apañar o prezado manxar desta zona, tan escaso e difícil de conseguir. Logo de meses de veda e varias xornadas de temporal, prevese que esta sexa unha boa campaña, os prezos oscilaban este martes entre os 50 euros o quilo dos máis pequenos ata os 200 euros o quilo das mellores pezas.
Os percebes do Roncudo son os máis demandados pola súa calidade, e os que, nestas datas, moitos devecen por ter nas súas mesas de Nadal. Un tamaño perfecto e un sabor exquisito que non é de balde, téñeno grazas á bravura do mar que golpea con forza as rochas deste lugar e que xa se cobrou a vida de moitos traballadores.
Os percebes do Roncudo só se poden coller dúas veces ao ano, en xullo e agora en decembro. Os mariscadores agardan que os consumidores particulares suplan a demanda da hostalaría, que este ano, sen dúbida, minguará de novo.