O Ministerio do Interior, a través da Dirección Xeral de Protección Civil e Emerxencias, está a realizar as probas correspondentes para verificar o funcionamento do protocolo Es-Alert para enviar alertas á poboación que se atope nunha zona afectada por emerxencias ou catástrofes inminentes. Trátase dun sistema que emite por onda de radio e está pensado para avisar á poboación ante situacións de crises como un furacán ou un terremoto. O sistema envía unha alerta cun asubío que non se deterá ata que se lea o contido. É a forma de asegurar que as persoas destinatarias lean o contido da mensaxe.
Esta semana comeza a fase de probas en distintas comunidades autónomas segundo o calendario no que Galicia está incluída o vindeiro xoves, xunto coa Comunitat Valenciana e Estremadura. Durante as probas, os centros de resposta a emerxencias, en coordinación co Centro Nacional de Seguimento e Coordinación de Emerxencias do Ministerio do Interior, enviarán mensaxes simuladas alertando dun risco de protección civil e un asubío, acompañado de vibración, aos teléfonos móbiles.
A nivel práctico, durante a xornada do xoves poderá soar un asubío nalgúns terminais situados en Galicia anunciando que se trata dunha mensaxe de proba do sistema de alertas de protección civil a través das redes de telefonía móbil e sinalando que non hai que facer nada especial. Hai que ter en conta que a alerta se activa mesmo se os terminais están silenciados, bloqueados ou en modo de non “molestar”, ante a necesidade de lectura naqueles casos onde existan riscos reais. O texto incluirá a palabra “PROBA” como indicativo de que se trata dun ensaio do sistema e non require de ningún xesto por parte dos usuarios. Unicamente deberá darlle a ACEPTAR “”, para que conste a lectura e retírese da pantalla do teléfono.