- A caseta que funcionaba como punto de atención a turistas trasladouse á praia de Area da Vila para un novo uso
O punto de información e atención aos turistas do Concello de Camariñas trasládase ao Museo do Encaixe co obxectivo de mellorar o servizo e mantelo activo durante todo o ano, sempre que a situación sanitaria o permita, e non só durante a época estival.
Ata o de agora este servizo prestábase nunha caseta na fachada marítima da vila que, precisamente este xoves, foi trasladada á praia de Area da Vila para acondicionala de cara ao verán. En canto ao espazo que deixa baleiro o stand, o Concello xa está traballando nun proxecto de novo uso que presentará proximamente.
Ademais, desde a corporación municipal destacan que, debido á boa evolución epidemiolóxica, está previsto que a finais deste mes reabran o Museo do Encaixe e o Museo Man de Camelle.