- Instalarase este venres na Praza do Concello e estará operativa ata o 9 de xaneiro en horario de 11:00 a 23:00 horas
Ten un dos alumeados de Nadal máis completos e fermosos de toda a Costa da Morte e, a partir deste venres, tamén contará cunha pista de xeo. Estamos a falar do Concello de Vimianzo, que por primeira vez dispoñerá dun dos elementos máis divertidos e demandados polos afeccionados á patinaxe e á diversión como é unha pista de xeo natural.
Estará instalada na Praza do Concello ata o día 9 de xaneiro e os usuarios poderán desfrutala a partir das 18:00 horas deste venres. O horario habitual da pista será de 11:00 a 23:00 horas. O prezo da entrada terá un custo de 5 euros (inclúe patíns) e poderase reservar na app móbil Saudeter. Será obrigatorio o uso de guantes e de máscara sanitaria.
Desde o goberno local sinalan que con este elemento buscan «ampliar o abano de posibilidades de ámbito lúdico durante o Nadal e, a maiores, contribuír á dinamización do comercio e hostalaría locais».