Coincidindo co inicio dos traballos de colocación da iluminación festiva, este venres presentouse o Nadal en Carballo nun acto no que participaron o alcalde, Daniel Pérez; unha ampla representación do goberno municipal e tamén das artesás, comerciantes e profesionais que tanto achegan para que a transición entre os anos 2025 e 2026 sexa o máis atractiva posible para toda a veciñanza.
É unha programación “transversal”, como a definiu o concelleiro Ramón Varela, froito das achegas de todas e cada unha das áreas municipais. E así foi posible elaborar un programa para todos os públicos, para todas as idades e para todos os gustos.
O programa pode descargarse ao final desta nova e a partir da semana que vén tamén poderá recollerse impreso nos edificios municipais. Está estruturado en diferentes apartados, desde a “inauguración oficial” do Nadal o xoves 5 de decembro co acendido da iluminación, ata a imprescindible cabalgata de Reis do 5 de xaneiro. Será, polo tanto, un mes completo de actividades.
Pensando na dinamización do comercio teremos propostas como a Feira de Artesanía, do 6 ao 8 de decembro; a Feira Doce, que se celebrará na fin de semana do 13 e 14, coincidindo coa feira dominical; os petiscos de Nadal que se servirán os días 18 e 28 no mercado municipal ou os Cantos de Nadal que animarán as rúas comerciais os días 14 e 28. Un ano máis contamos coa colaboración co Centro Comercial Aberto (CCA), que estivo representado no acto pola súa xerente, Yolanda Antelo, e cuxas propostas están incluídas tamén no programa. Teremos unha caseta chegada directamente de Laponia para que Papá Noel se sinta coma na casa na estancia que realizará do 20 ao 24 de decembro.
Xunto ao imprescindible Nadal Pequespectacular, que, coma sempre, ofrecerá tres espectáculos de circo, teatro, música e maxia primeirísimo nivel, este ano volve o Nadal Rebuldeiro, pensado para facer moverse á rapazada. A peza central será Mundo Xogo, que o ano pasado arrasou e que nesta ocasión trae novos espazos: o Polo Pepe, Carrera First, Playmobil Júnior e Wiltopía, Rolly Toys e Piratix ocuparán a carpa da Praza do Concello do 19 ao 24 de decembro.
Pero, ademais, o día 27 teremos unha das novidades deste ano, unha xornada de laser tag na que teremos que rescatar o espírito do Nadal, e o sábado seguinte, 3 de xaneiro, encheremos a carpa da maxia do cine, con sesións infantil e para público adulto. E para completar as estreas, o 29 de decembro pola tarde celebraremos o Nadal sobre rodas para desprazarnos polos novos parques infantís nun autobús moi especial. Non perdades detalle!
O 2 de xaneiro sacaremos de novo as bicis para participar nunha divertida xincana de elfos. As actividades do programa Apego, como a foliada do día 26, e das bibliotecas completan a oferta vacacional para a infancia.
Co ánimo de facilitar aínda máis a conciliación e de ofrecer alternativas de ocio a toda a rapazada volve o campamento no mercado, para nenos/as de 3 a 12 anos, e tamén o campamento do programa Concilia, que se abre a todas as familias.
E pensando no público adulto temos tamén propostas diferenciadas, como os cursos de cociña de Nadal, que, despois da gran demanda do ano pasado, serán máis e de maior duración. O domingo 28 celebraremos un baile pre fin de ano para todos os públicos na carpa da Praza do Concello, coa actuación de Laura Añón, Ángel Sevilla e JJ Compota de 19.00 a 23.00 horas, con badaladas incluídas e moita animación.
“Desde o Concello temos clarísimo que o Nadal é unha época clave para o comercio local, e pensamos que con este programa, con todo o contido que ten e o que se estende no tempo, podemos contribuír a que Carballo siga sendo o gran centro comercial de toda a comarca, e mesmo de máis alá”, sinalou o alcalde.
“Que a xente se sinta a gusto en Carballo, que os nenos e nenas, pero tamén os maiores, teñan moitas opcións para aproveitar as vacacións, e que a veciñanza desfrute da rúa e do comercio carballés é o noso gran obxectivo, e sen a colaboración de todas as concellarías, do persoal municipal, das asociacións que dinamizan as parroquias e dos profesionais que están hoxe aquí representados, non sería posible. Por iso, a todas e todos, o meu agradecemento”, concluíu Daniel Pérez.