A conselleira de Política Social, Fabiola García, anunciou que todas as residencias de maiores contarán cun programa de redución de suxeicións, con medidas concretas e avaliables, polo que avogou por limitar ao mínimo imprescindible este procedemento para “asegurar o benestar de todas as persoas que viven nestes centros e para que os sintan como o que son: os seus fogares”.
O novo modelo de residencias que está a ultimar o Comité asesor sociosanitario establece que todos os centros de maiores da comunidade estarán obrigados a reducir as suxeicións ao mínimo posible. Deste xeito, cumprirase cun dos principais obxectivos da reformulación do sistema: “seguir humanizando, cada vez máis, uns centros que deben ser a casa das persoas”.
Para limitar o uso de medidas de contención farase un esforzo importante en tres ámbitos: na formación do persoal; na adaptación de espazos para facelos máis accesibles; e no uso de novas tecnoloxías, para a detección de caídas ou outras incidencias.