- O pontífice instou ás grandes empresas tecnolóxicas a que combatan este grave problema
Durante este mércores 14 e xoves 15, a Casina Pío IV da Cidade do Vaticano acolle o Encontro internacional para “Promover a dignidade dixital do neno – Do concepto á acción”.
O Papa Francisco recibiu na Sala Clementina do Palacio Apostólico a decenas de integrantes e representantes de xigantes tecnolóxicos como Facebook, Google, Amazon ou Apple entre diversas oenegués e políticos que se reuniron para discutir sobre a protección do neno na internet.
O pontífice alertaba do perigo da pornografía infantil e instou ás grandes empresas a que loiten contra a mesma. “Agora está claro que as compañías de alta tecnoloxía non poden considerarse completamente alleas aos servizos que brindan aos seus clientes. Así que fago un chamamento urxente á responsabilidade cara aos menores, a súa integridade e o seu futuro”, dixo o Papa.
Francisco lembrou que a media de idade do primeiro acceso á pornografía na internet é actualmente de 11 anos e que tende a baixar e engadiu que “O que fai que este fenómeno sexa aínda máis inquietante é o feito de que este material é amplamente accesible mesmo para menores a través de Internet, especialmente a través de dispositivos móbiles. Seguramente terá efectos para sempre en eles”.
A conferencia concluirá este venres coa mirada posta en presentar iniciativas concretas para garantir a seguridade dos menores no mundo dixital.